ՀՀ դեսպանի ուղերձը Հայոց բանակի 21-ամյակի առթիվ

28 հունվարի, 2013

Հարգելի՛ հայրենակիցներ,

Այսօր լրանում է անկախ Հայաստանի անկախ բանակի 21-ամյակը, ինչի առթիվ ցանկանում եմ շնորհավորել կանադահայությանը: Լրանում է 21-ամյակն այն բանակի, որը կարևոր հաղթանակ տարավ Արցախյան ազատամարտում:

Հայոց բանակի պատմությունը չի սահմանափակվում այս երկու տասնամյակներով. այն սկսվում է դեռ Հայկ Նահապետից ու թագավորական անցյալից, հազարամյակների փորձը դրսևորում Արցախի մելիքություններում: Հայ զինվորի քաջությունն ու վեհությունը ճանաչում և պատվում էին սասանյան պարսիկներն ու բյուզանդացիները, հայ զինվորի սխրանքները գովաբանում էին հայ ու օտար պատմիչները:

Խաչակրաց արշավանքներից դարեր առաջ Հայոց բանակը խաչը ձեռքին Ավարայրի դաշտում կենաց և մահու կռիվ էր տալիս իր հավատքի համար:

Հայ ժողովրդի գոյության հազարամյակների ընթացքում` Ուրարտուից մինչև Կիլիկիա, Հայոց բանակը մշտապես անհավասար պայքար է մղել օտար զավթիչների դեմ` նպաստելով հայի գոյատևմանը:

Հայոց բանակը Հայաստանի ողնաշարն է. ինչպես դարերի խորքում, մեր օրերում էլ այն ոտքի կանգնեց և պաշտպանեց Հայրենիքը, ազատագրեց Արցախը օտար լծից:

Այսօր, հարևան Ադրբեջանի սպառնալիքներին և ռազմատենչ քաղաքականությանը հակակշռելու համար Հայաստանի բանակը մշտապես զգոն ու պատրաստ կանգնած է երկրի սահմաններին` զինված լավագույն ժամանակակից սպառազինություններով: Սակայն Հայոց բանակի նպատակն է սեփական սահմանների խաղաղության և կայունության ապահովումը` ի նպաստ Հայաստանի, Արցախի և ողջ հայության:

Շնորհավո՜ր տոնդ, հա՛յ զինվոր:

Արմեն Եգանյան

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր