«Ավրորայի լուսաբացը» ֆիլմի ցուցադրություն Կանադայի մայրաքաղաքում

30 ապրիլի, 2025

Հայոց ցեղասպանության 110-րդ տարելիցին նվիրված հիշատակի միջոցառումների շրջանակներում ապրիլի 29-ին Կանադայում ՀՀ դեսպանության նախաձեռնությամբ, Զորյան ինստիտուտի աջակցությամբ, Օտտավայի արվեստի պատկերասրահում տեղի ունեցավ «Ավրորայի լուսաբացը» անիմացիոն ֆիլմի* հատուկ ցուցադրություն։ Ֆիլմը ներկայացնում է Հայոց ցեղասպանությունից փրկված Արշալույս Մարտիկյանի (Ավրորա Մարդիգանյանի) կյանքի պատմությունը։

Միջոցառման մեկնարկին ելույթներով հանդես եկան Ն.Գ. ՀՀ դեսպան Անահիտ Հարությունյանը և Զորյան ինստիտուտի կորպորատիվ գործադիր խորհրդի անդամ Տիրան Ավետյանը։
Շնորհակալություն հայտնելով Զորյան ինստիտուտին աջակցության համար՝ իր խոսքում ՀՀ դեսպանն անդրադարձավ ֆիլմի խորհրդին և կարևորեց Ավրորա Մարդիգանյանի դերը Հայոց ցեղասպանության փաստը տարիներ շարունակ աշխարհին ներկայացնելու տեսանկյունից, ինչով վերջինս կարծես ձայն է հաղորդել միլիոնավոր զոհերին և փրկվածներին։ Նշվեց, որ ֆիլմի հերոսուհին ցեղասպանության սարսափի ժամանակ տեղ գտած խիզախության և ուժի օրինակներից մեկն էր։ ՀՀ դեսպանը հույս հայտնեց, որ ֆիլմը ներկաներին խորհելու առիթ կընձեռի։
Տիրան Ավետյանը ներկայացրեց Զորյան ինստիտուտի՝ Հայոց ցեղասպանության բանավոր պատմության արխիվի նշանակությունը միջազգային բազմաթիվ մրցանակների հաղթող «Ավրորայի լուսաբացը» ֆիլմի ստեղծման և, ընդհանրապես՝ Հայոց ցեղասպանությունից փրկվածների պատմությունների՝ դեռևս 1980-ական թթ. ի վեր պահպանման գործում։

Ցուցադրությանը ներկա գտնվեցին ավելի քան 200 հյուրեր՝ Կանադայի ԱԳ նախարարության և այլ պետական մարմինների պաշտոնյաներ, ավելի քան 30 երկրների դեսպաններ, հավատարմագրված դիվանագիտական առաքելությունների այլ ներկայացուցիչներ, կանադահայոց թեմի առաջնորդ Գերաշնորհ Տ. Աբգար եպիսկոպոս Հովակիմյանը, հոգևոր հայրեր, Քվեբեկում ՀՀ պատվո հյուպատոս Լևոն Աֆեյանը, ինչպես նաև կանադացի կինոսերներ և կանադահայ համայնքի անդամներ։

*«Ավրորայի լուսաբացը» ֆիլմն ստեղծվել է Զորյան ինստիտուտի գիտական աջակցությամբ և Զորյան ինստիտուտի՝ Հայոց ցեղասպանության բանավոր պատմության արխիվի հիման վրա։ Ֆիլմի ռեժիսորը և սցենարի հեղինակը Իննա Սահակյանն է։
Արտադրող ընկերություն՝ «Բարս Մեդիա» վավերագրական ֆիլմերի ստուդիա (Հայաստան), համարտադրող ընկերություններ՝ «Gebrueder Beetz Filmproduktion» (Գերմանիա) և «Artbox Laisvalaikio Klubas» (Լիտվա)։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր