Դեսպան Հարությունյանի աշխատանքային այցը Վինձոր քաղաք

19 մայիսի, 2025

Մայիսի 17-ին Ն.Գ. ՀՀ դեսպան Անահիտ Հարությունյանը Վինձոր կատարած աշխատանքային այցի շրջանակներում ներկա գտնվեց «Վինձորի հայկական համայնքը» և «Քարշը Վինձորում» խորագրով ժամանակավոր ցուցադրությունների պաշտոնական բացման արարողություններին, որոնք տեղի ունեցան համապատասխանաբար քաղաքի Չիմչուկ թանգարանում և «Art Windsor-Essex» պատկերասրահում։

Իր բացման խոսքում ՀՀ դեսպանը ներկաների ուշադրություն հրավիրեց այն հանգամանքի վրա, որ միջոցառումները տեղի են ունենում Օնտարիոյի նահանգում նշվող «Հայկական ժառանգության ամսվա» շրջանակներում։
Նշվեց, որ «Վինձորի հայկական համայնքը» ցուցադրությունը ներկայացնում է հայ ժողովրդի տոկունության տպավորիչ պատմությունը, որը չնայած հսկայական դժվարություններին, պահպանել է իր մշակութային ինքնությունը և նշանակալի կերպով ներդրում է ունեցել իր նոր համայնքում։ Այդ համատեքստում Ա. Հարությունյանը կարևորեց Կանադայի հայկական համայնքի դերը երկկողմ հարաբերությունների զարգացման գործում։
ՀՀ դեսպանն առանձնահատուկ շնորհակալություն հայտնեց Վինձորի համալսարանի պրոֆեսոր Քրիստոֆեր Ուոթերզին ցուցադրությունները նախաձեռնելու և կազմակերպելու համար։

Միջոցառումներին ներկա գտնվեց շուրջ 100 հյուր՝ Վինձորի քաղաքապետարանի ավագանու և կանադահայ համայնքի ներկայացուցիչներ, ինչպես նաև բազմաթիվ այլ արվեստասերներ։

«Վինձորի հայկական համայնքը» ցուցադրությունը բաց է լինելու մինչև օգոստոսի 31-ը։
Կանադահայ հռչակավոր լուսանկարիչ Յուսուֆ Քարշի աշխատանքների մասին ցուցադրությունը բաց է լինելու մինչև հունիսի 1-ը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր