ՀՀ անկախության 34-ամյակին և ՀՀ դեսպանության հիմնադրման 30-ամյակին նվիրված պաշտոնական ընդունելություն Օտտավայում

02 հոկտեմբերի, 2025

Հոկտեմբերի 2-ին Կանադայում Հայաստանի Հանրապետության դեսպանությունում տեղի ունեցավ Անկախության 34-րդ և Դեսպանության հիմնադրման 30-րդ տարեդարձներին նվիրված պաշտոնական ընդունելություն:

Միջոցառմանը բացման խոսքով և շնորհավորական ուղերձով հանդես եկավ Ն.Գ. ՀՀ դեսպան Անահիտ Հարությունյանը: Ելույթ ունեցավ նաև Կանադահայոց թեմի առաջնորդ Գերաշնորհ Տեր Աբգար եպիսկոպոս Հովակիմյանը։ Վերոնշյալ տարեդարձների կապակցությամբ շնորհավորական ուղերձներ էին հղել Կանադայի Օնտարիոյի նահանգապետ Դագ Ֆորդը, Օնտարիո նահանգի խորհրդարանի հայազգի պատգամավոր Արիս Պապիկյանը և ԱՄՆ Հայոց Արևմտյան թեմի առաջնորդ Տեր Հովնան արքեպիսկոպոս Տերտերյանը*։

Շնորհավորելով ներկաներին վերոնշյալ երկու կարևոր և փոխկապակցված իրադարձությունների առթիվ՝ դեսպան Հարությունյանը կարևորեց անկախության խորհուրդը՝ մասնավորապես ընդգծելով, որ պետության ապագան կերտվում է ոչ միայն առերեսվող իրադարձություններով, այլև դրանց արձագանքելու ունակությամբ, այն է՝ միասնականությամբ, արժանապատվությամբ և քայլերի խորը գիտակցմամբ։ Անդրադառնալով դեսպանության 30-ամյակին՝ Ա. Հարությունյանը մեծապես կարևորեց կանադահայ համայնքի անգնահատելի և նվիրական ներդրումը ՀՀ դեսպանության շենքի հիմնադրման գործում, ինչպես նաև շարունակական աջակցությունը Հայաստանին բազմաբնույթ ծրագրերի միջոցով։

Միջոցառման երաժշտական մասն ապահովեցին կանադահայ սոպրանո Սաշա Ջիհանյանը և դաշնակահար Արտեն Արաբյանը։ Ընդունելությանը ներկա գտնվեցին Քվեբեկում ՀՀ պատվո հյուպատոս Լևոն Աֆեյանը, Կանադայի գործադիր և օրենսդիր մարմինների, ՀՀ դեսպանության հիմնադրման ակունքներում կանգնած հայկական համայնքի բազմաթիվ ներկայացուցիչներ, ինչպես նաև մշակույթի և գիտության ոլորտի գործիչներ։

*Տեր Հովնան արքեպիսկոպոս Տերտերյանը եղել է Կանադայի Հայոց թեմի առաջնորդը 1990-2003 թթ.:

Ելույթի ամբողջական տարբերակը հասանելի է հետևյալ հղմամբ՝
https://canada.mfa.am/en/news/2025/10/02/armembcan_Ambassador_Speech_Independence_Day_34_Embassy_establishment_30_reception_Ottawa/14798

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր