ՀՀ դեսպանի մասնակցությունն Օնտարիոյի խորհրդարանում Հայկական ժառանգության ամսվան նվիրված ամենամյա միջոցառմանը

27 մայիսի, 2026

Մայիսի 25-ին ՀՀ դեսպան Անահիտ Հարությունյանը Կանադայի Օնտարիո նահանգի խորհրդարանում մասնակցեց Հայկական ժառանգության ամսվան* նվիրված ամենամյա պաշտոնական միջոցառմանը։

Դեսպան Հարությունյանն իր ողջույնի խոսքում նշանակալի և ողջունելի անվանեց նահանգի օրենսդիր մարմնում վարչապետի ներկայությամբ հայկական ժառանգության հանրահռչակումը։
Վկայակոչելով Կանադայում բազմամշակույթ հասարակության մոդելի հաջողության առանձնահատկությունները՝ Ա. Հարությունյանն ընդգծեց, որ վերոնշյալ միջոցառմամբ ոչ միայն ներկայացվում է հայկական ժառանգությունը, այլև կարևորվում է հայկական համայնքի ներդրումը երկրի զարգացման գործում։
Այդ համատեքստում ՀՀ դեսպանն շնորհակալություն հայտնեց նահանգային խորհրդարանի անդամ Արիս Բաբիկյանին վերջինիս դերակատարության և շարունակական ջանքերի համար։

Միջոցառմանը ներկա էին նաև Օնտարիոյի վարչապետ Դագ Ֆորդը, Կանադայի հայոց թեմի առաջնորդ, Գերաշնորհ Տ. Բաբկեն արքեպիսկոպոս Չարյանը, Կանադահայոց թեմի առաջնորդական փոխանորդ և Տորոնտոյի Սուրբ Երրորդություն հայ եկեղեցու հոգևոր հովիվ, Արժանապատիվ Տ. Զարեհ ավ. քահանա Զարգարյանը, նահանգի կառավարության, խորհրդարանի բազմաթիվ անդամներ, այլ հոգևոր հայրեր, ինչպես նաև հայկական համայնքի ներկայացուցիչներ։

* 2022թ. մարտին Օնտարիոյի խորհրդարանը միաձայն կերպով ընդունել է 105-րդ օրինագիծը, որով մայիսը նահանգում հռչակվել է Հայկական ժառանգության ամիս։ Օրինագիծը ներկայացրել էր նահանգային խորհրդարանի անդամ Արիս Բաբիկյանը։
https://www.ola.org/en/legislative-business/bills/parliament-42/session-2/bill-105

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր