Համայնքի մասին

Հայերը Կանադայում բնակություն են հաստատել 19-րդ դարի 80-ական թվականներին:

2009թ. տվյալներով Կանադայում բնակվում է շուրջ 81,5 հազար հայ, ովքեր հիմնականում ապրում են Մոնրեալ եւ Տորոնտո քաղաքներում, ինչպես նաեւ` Վանքուվեր, Սենթ Կաթրինզ, Համիլթոն, Քեբեկ, Օտտավա, Վինձոր քաղաքներում եւ Նովա Սկոշիա ու Նյու Բրանսվիկ նահանգներում:

Կանադայում գործում են Հայաստանյաց Առաքելական Սուրբ Եկեղեցու Կանադայի թեմը (կազմավորվել է 1984թ., առաջնորդանիստը` Մոնրեալի Սբ. Գրիգոր Լուսավորիչ եկեղեցի, առաջնորդը` Տ. Աբգար եպիսկոպոս Հովակիմյան) եւ Մեծի Տանն Կիլիկիո Կաթողիկոսության Կանադայի թեմը (առաջնորդանիստը` Մոնրեալի Սբ. Հակոբ եկեղեցի, առաջնորդը` Տ. Մեղրիկ եպիսկոպոս Բարիքեան): Առաջին հայկական Սուրբ Գրիգոր Լուսավորիչ եկեղեցին կառուցվել է 1930թ. Սենթ Կաթրինզում: Ներկայումս Հայ Առաքելական եկեղեցիներ գործում են Մոնրեալում, Տորոնտոյում, Լավալում, Սենթ Կաթրինզում, Վանքուվերում, Վինձորում, Համիլթոնում, Քեմբրիջում:

Կանադայում գործում են նաեւ Հայ կաթողիկե եւ Հայ ավետարանական համայնքներ` իրենց եկեղեցիներով, կրթական եւ մշակութային կառույցներով:

Կանադայի հայկական կազմակերպությունները

«Մամիկոնյան» մշակութային կազմակերպությունը հիմնադրվել է 1959թ. Մոնրեալում: Գործում է Հայաստանյաց Առաքելական Սուրբ Գրիգոր Լուսավորիչ եկեղեցու հովանու ներքո: Բեմադրում է պիեսներ, օպերետներ, կազմակերպում համերգներ, հայ մշակույթին վերաբերող դասախոսություններ:
Կանադայի «Հայ Դատի» գրասենյակը (Armenian National Committee of Canada -ANCC), հիմնադրվել է 1965թ. եւ նպատակ է հետապնդում տեղեկացնել կանադական հասարակությանը հայկական խնդիրների վերաբերյալ, այդ խնդիրները բարձրացնել կանադական կառավարության առջեւ եւ խթանել մարդու իրավունքները:
«Պոլսահայ մշակութային միություն» հայրենակցական մշակութային կազմակերպությունը հիմնադրվել է Մոնրեալում 1967թ. Կանադա գաղթած պոլսահայերի նախաձեռնությամբ: Միության հովանու ներքո գործում են «Մեկ» մշակութային հանձնախումբը, «Մնակյան» թատերախումբը, «Շիրակ» պարախումբը, «Արարատ» մարզական թիմը, «Սայա» երիտասարդական կազմակերպությունը: 1969թ-ից հրատարակում է «Գեղարդ» պաշտոնաթերթը:
«Քեբեկի հայ բժշկական ընկերակցությունը» հիմնադրվել է 1975թ.: Նպատակն է աջակցել բժշկության ասպարեզ մուտք գործող հայազգի մասնագետներին:
«Քեբեկի հայագիտական ուսումնասիրությունների միություն»-ը, հիմնադրվել է 1982 թվականին: Քեբեկի նահանգի համալսարաններում եւ քոլեջներում նախաձեռնել է հայոց լեզվի, գրականության եւ պատմության դասընթացներ:
«Հայկական ժամանակակից հետազոտությունների եւ վավերագրման Կանադայի Զորյան ինստիտուտը» հիմնադրվել է 1985թ. Տորոնտոյում: Հրատարակում է գիտական ուսումնասիրություններ, արխիվային փաստաթղթեր, 1991թ-ից հրատարակում է “Diaspora Journal” հանդեսը:
«Կանադայի հայ գործարար խորհուրդը» ստեղծվել է 1986թ. Մոնրեալում, մասնաճյուղերը գործում են Կանադայի հայ համայնքներում: Նպատակն է` նպաստել երկու երկրների հայ գործարարների միջեւ համագործակցության սերտացմանը, հայկական ապրանքների առեւտրաշրջանառության ընդլայնմանը:
«Րաֆֆի» մշակութային միությունը ստեղծվել է 1988թ.: Միությունը համախմբում է կանադաբնակ իրանահայերին, նպաստում հայ մշակույթի պահպանմանն ու զարգացմանը: Ունի կանանց եւ երիտասարդական խմբեր, նաեւ` ֆուտբոլի թիմ:
«Օնտարիո նահանգի կանադահայ բժշկական ընկերակցություն» (ACMAO) բարեգործական կազմակերպությունը հիմնադրվել է 1988 թվականին:
«Մոնրեալի եգիպտահայերի ընկերակցություն» հայրենակցական միությունը ստեղծվել է 1997թ.: Զբաղվում է մշակութային եւ բարեգործական գործունեությամբ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր