ՀՀ դեսպանի հանդիպումը Կանադայի պաշտոնական ընդդիմության առաջնորդի հետ

29 հունվարի, 2013

Ս.թ. հունվարի 29-ին տեղի ունեցավ Կանադայում ՀՀ դեսպան Արմեն Եգանյանի հանդիպումը Կանադայի պաշտոնական ընդդիմության առաջնորդ, Նոր դեմոկրատներ կուսակցության ղեկավար Թոմաս Մուլկեյրի հետ:

Հանդիպման ընթացքում կողմերը քննարկեցին հայ-կանադական քաղաքական, տնտեսական, մշակութային կապերին վերաբերող մի շարք հարցեր, երկու պետությունների միջև հանքարդյունաբերության և բարձր տեխնոլոգիաների ոլորտներում առկա առևտրատնտեսական փոխգործակցության հեռանկարները, գոհունակությամբ նշեցին, որ Կանադան 2012թ. առաջատարն է ՀՀ-ում ներդրումների ոլորտում: Պրն. Մուլքեյրը շնորհավորեց Ֆրանկոֆոնիայի միջազգային կազմակերպությանը Հայաստանի լիիրավ անդամակցության կապակցությամբ, ինչի առնչությամբ ՀՀ դեսպանը նշեց, որ դա նոր հնարավորություններ է ընձեռում երկու երկրների միջև առկա ամուր կապերն էլ ավելի խթանելու համար:

Կողմերն անդրադարձան Հարավային Կովկասի տարածաշրջանային մարտահրավերներին և առաջնահերթություններին: Դեսպան Եգանյանը ընդդիմության առաջնորդին ներկայացրեց ԼՂՀ հիմնախնդրի կարգավորման գործընթացը` շեշտելով հակամարտության խաղաղ կարգավորման կարևորությունը:

Դեսպանը իր երախտագիտությունը հայտնեց Թ.Մուլկեյրին Հայոց ցեղասպանության ճանաչմանն իր և իր ղեկավարած կուսակցության շարունակական աջակցության համար և հավելեց, որ մարդկության դեմ ոճիրների կրկնությունը հետագայում բացառելու նպատակով անհրաժեշտ է դատապարտումն ամրագրել օրենքի ուժով:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր