Դեսպան Եգանյանի հանդիպումը Կանադայի արտաքին գործերի նախարարի խորհրդարանական քարտուղար Բոբ Դեքերտի հետ

26 մարտի, 2013

Մարտի 26-ին Կանադայում ՀՀ դեսպան Արմեն Եգանյանը հանդիպեց Կանադայի արտաքին գործերի նախարարի խորհրդարանական քարտուղար Բոբ Դեքերտին:

Հանդիպման ընթացքում կողմերը քննարկեցին երկկողմ հարաբերություններին և միջխորհրդարանական կապերին վերաբերող հարցեր, մանրամասն զրուցեցին Հայաստանի և Կանադայի միջև առկա տնտեսական կապերի վերաբերյալ: Դեսպան Եգանյանը մեծապես կարևորեց Կանադայի ներդրումների ծավալների ընդլայնումը Հայաստանում և հայ-կանադական առևտրատնտեսական կապերը զարգացնելու հեռանկարները հանքարդյունաբերության ու բարձր տեխնոլոգիաների ոլորտներում:

Այնուհետև Արմեն Եգանյանը Բոբ Դեքերտին մանրակրկիտ ներկայացրեց Հարավային Կովկասի աշխարհաքաղաքական պատկերը` կենտրոնանալով Լեռնային Ղարաբաղի հակամարտության կարգավորման և հայ-թուրքական հարաբերությունների վրա: Դեսպանը նշեց, որ ԼՂ հիմնահարցի կարգավորման միակ ձևաչափը ԵԱՀԿ Մինսկի խումբն է և որ ՀՀ գնահատում է Կանադայի աջակցությունը խմբի ջանքերին: Անդրադառնալով հայ-թուրքական հարաբերությունների կարգավորման փորձին` դեսպան Եգանյանը հայտնեց, որ հայկական կողմն էր նախաձեռնել հարաբերությունների` առանց նախապայմանների կարգավորման գործընթացը, որի արդյունքում ստորագրվեցին երկու հայտնի արձանագրությունները, սակայն թուրքական վարչակազմը, չհարգելով իր իսկ ստորագրությունն ու միջազգային հանրության առջև ստանձնած պարտավորությունները, վերադարձավ նախապայմանների լեզվին:

Հանդիպման ավարտին կողմերը գոհունակությամբ ընդգծեցին ՀՀ դեսպանության և Կանադայի արտաքին գերատեսչության, խորհրդարանի, ինչպես նաև այլ պետական մարմինների միջև առկա աշխատանքային հարաբերությունների բարձր մակարդակը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր