Դեսպան Եգանյանի հանդիպումը Կանադայի Զինված ուժերի գլխավոր հոգևոր առաջնորդի հետ

17 մարտի, 2016

Մարտի 17-ին Կանադայում ՀՀ դեսպան Արմեն Եգանյանը հանդիպում ունեցավ Կանադայի Զինված ուժերի գլխավոր հոգևոր առաջնորդ (կապելան), գեներալ-բրիգադիր Գի Շապդելենի հետ: Հանդիպմանը հրավիրված էր նաև Հայ Առաքելական եկեղեցու Կանադայի թեմի առաջնորդ Աբգար եպիսկոպոս Հովակիմյանը:

Հանդիպմանը քննարկվեց տարբեր ոլորտներում հայ-կանադական հարաբերություններին առնչվող հարցերի լայն շրջանակ:

Կողմերն անդրադարձան հայ-կանադական արդյունավետ փոխգործակցությանը միջազգային հարթակներում, այդ թվում Ֆրանկոֆոնիայի միջազգային կազմակերպության շրջանակներում, ինչպես նաև Հայաստանի մասնակցությանը աշխարհի տարբեր երկրներում իրականացվող խաղաղապահ առաքելություններին:

Դեսպան Եգանյանն ու Աբգար եպիսկոպոս Հովակիմյանը պարոն Շապդելենին ներկայացրին ՀՀ Զինված ուժերում գործող հոգևոր առաջնորդության ծառայությունը` մեծապես կարևորելով վերջինիս դերը զինված ուժերի բարոյահոգեբանական իրավիճակի վրա ունեցած ազդեցության տեսանկյունից: Մտքեր փոխանակվեցին երկու երկրների զինված ուժերի հոգևոր ծառայությունների միջև համագործակցության և փորձի փոխանակման վերաբերյալ: Երկուստեք պայմանավորվածություն ձեռք բերվեց ուսումնասիրել փոխգործակցության, այդ թվում փոխայցելությունների հնարավորությունը:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր