Դեսպան Եգանյանի հանդիպումը Կանադայի խորհրդարանի Հասարակական կարգի և ազգային անվտանգության մշտական հանձնաժողովի նախագահի հետ

24 մարտի, 2016

Մարտի 24-ին Կանադայում ՀՀ դեսպան Արմեն Եգանյանը հանդիպում ունեցավ Կանադայի խորհրդարանի անդամ, Հասարակական կարգի և ազգային անվտանգության մշտական հանձնաժողովի նախագահ Ռոբերտ Օլիֆանտի հետ:

Ռոբերտ Օլիֆանտը, նշելով, որ դրական հուշեր ունի 2010թ. Հայաստան կատարած իր այցից, դեսպան Եգանյանին ներկայացրեց Հայաստանի վերաբերյալ իր տպավորությունները: Իր հերթին ՀՀ դեսպանը պարոն Օլիֆանտին ներկայացրեց հայ-կանադական երկկողմ հարաբերությունների ներկայիս իրավիճակն ու վերջին զարգացումները փոխադարձ հետաքրքրություն ներկայացնող բոլոր ոլորտներում:

Այնուհետև դեսպան Եգանյանն անդրադառձավ 2015թ. ընթացքում Հայաստանում և աշխարհի տարբեր երկրներում, այդ թվում Կանադայում կայացած` Հայոց ցեղասպանության 100-րդ տարելիցին նվիրված միջոցառումներին:

Քննարկվեցին մարտի 14-ից 20-ը Կանադայի Օնտարիո նահանգի համայնքային անվտանգության (Ոստիկանություն) նախարարի տեղակալ Մեթյու Թորիգյանի գլխավորած պատվիրակության` Հայաստան կատարած պաշտոնական այցի մանրամասները: Ա.Եգանյանը Ռ.Օլիֆանտին տեղեկացրեց, որ այցի ընթացքում պատվիրակության անդամները մի շարք քննարկումներ ունեցան ՀՀ տարբեր պետական գերատեսչություններում, այդ թվում հանդիպելով ՀՀ սփյուռքի նախարար Հրանուշ Հակոբյանի, Ազգային ժողովի պաշտպանության, ազգային անվտանգության և ներքին գործերի մշտական հանձնաժողովի նախագահ Կորյուն Նահապետյանի, ինչպես նաև ՀՀ Ոստիկանության պետ, գեներալ-լեյտենանտ Վլադիմիր Գասպարյանի և Ոստիկանության տարբեր ստորաբաժանումների պատասխանատուների հետ: Դեսպանն ընդգծեց, որ այցը նպատակ ուներ աջակցել ՀՀ ոստիկանության կրթահամալիրում տեղի ունեցող բարեփոխումներին:

Ա.Եգանյանը ներկայացրեց սիրիահայ փախստականների դրությունը և նրանց հուզող խնդիրները: Դեսպանը, նշելով, որ Հայաստանն իր հերթին ընդունել է շուրջ 20000 սիրիահայերի և այլ փախստականների Սիրիայաից, պարոն Օլիֆանտին ծանոթացրեց Հայաստանում ապաստանած սիրիահայերի աջակցության համար գործադրվող ջանքերին:

Կողմերը քննարկեցին աշխարհի տարբեր երկրներում իրականացվող խաղաղապահ առաքելություններին Հայաստանի մասնակցությունը: Մտքեր փոխանակվեցին միջազգային հարթակներում հայ-կանադական արդյունավետ փոխգործակցության վերաբերյալ, մասնավորապես Ֆրանկոֆոնիայի միջազգային կազմակերպության շրջանակներում: Այդ համատեքստում խոսվեց նաև 2016թ. մարտի 20-ից Հայաստանում մեկնարկած Ֆրանկոֆոնիայի երկամսյակի մասին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր