Դեսպան Եգանյանի հովանու ներքո Մոնրեալում կայացան Կանանց միջազգային օրվան նվիրված միջոցառումներ

12 մարտի, 2017

Մարտի 11-ին և 12-ին Կանադայում ՀՀ դեսպան Արմեն Եգանյանի հովանու ներքո և Կանադայի Հայ Օգնության Միության (ՀՕՄ) նախաձեռնությամբ Մոնրեալ քաղաքում կայացան Կանանց միջազգային օրվան նվիրված միջոցառումներ:

Նախ Մոնրեալի Հայ կենտրոնում տեղի ունեցավ հայտնի կինոբեմադրիչ Պարետ Մարոնյանի «1915-ի կանայք» վավերագրական ֆիլմի ցուցադրությունը:

Միջոցառմանը ներկա էին դեսպան Եգանյանը, Կանադայի Հայոց թեմի առաջնորդ, գերաշնորհ Բաբկեն եպիսկոպոս Չարյանը, հայ համայնքային կառույցների ղեկավարներ, բազմաթիվ մոնրեալահայեր:

Ֆիլմի ցուցադրությունից հետո ունեցած իր ելույթում դեսպան Եգանյանը շեշտեց, որ ֆիլմը, Հայոց ցեղասպանության միջազգային ճանաչման գործում կարևոր արժեք հանդիսանալուց բացի, յուրահատուկ հարգանքի տուրք է Ցեղասպանությանը զոհ գնացած հայ կանանց հանդեպ: Դեսպանը շնորհակալական խոսքեր հղեց ֆիլմի հեղինակ Պարետ Մարոնյանին և, առհասարակ, ֆիլմի ստեղծման գործում ներդրում ունեցած բոլոր մարդկանց հասցեին:

Մարտի 12-ին տեղի ունեցած միջոցառմանը ՀՀ դեսպանը շնորհավորեց ինչպես ձեռնարկին ներկա, այնպես էլ բոլոր կանանց` Կանանց միջազգային օրվա կապակցությամբ` մաղթելով նրանց անսպառ եռանդ` ապագայում ևս այն ի բարօրություն Հայրենիքի իրականացվող նախաձեռնություններում ներդնելու համար:

Երեկոյի ընթացքում Արմեն Եգանյանը ՀՕՄ երկարամյա ատենապետուհի Վանուհի Իսաջանյանին հանձնեց ՀՀ Նախագահ Սերժ Սարգսյանի կողմից Հայրենիք-Սփյուռք կապերի ամրապնդման և զարգացման գործում ներդրած ավանդի համար վերջինիս շնորհված Երախտագիտության մեդալը:

ՀՀ դեսպանի կողմից տիկին Իսաջանյանին Երախտագիտության մեդալի հանձնման վերաբերյալ տեսանյութը հասանելի է այստեղ:

Լուսանկարները և տեսանյութը` «ՀայՀորիզոն»-ի:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր