Դեսպան Հարությունյանը մասնակցեց Հայաստանին վերաբերող կլոր սեղան-քննարկմանը

04 փետրվարի, 2025

Հունվարի 31-ին Օտտավայի Կարլտոն համալսարանի Եվրոպայի, Ռուսաստանի և եվրասիական ուսումնասիրությունների ինստիտուտի «Արևելյան Եվրոպայի և անդրատլանտյան ցանց» նախաձեռնությունը կազմակերպեց կլոր սեղան-քննարկում Հարավային Կովկասի, մասնավորապես՝ Հայաստանի և Վրաստանի առջև ծառացած անվտանգային մարտահրավերների թեմայով։

Ն.Գ. ՀՀ դեսպան Ա. Հարությունյանը մասնակցեց քննարկմանը և հանդես եկավ բացման խոսքով` ներկայացնելով ՀՀ դիրքորոշումը Հվ. Կովկասում տեղի ունեցող վերջին զարգացումների վերաբերյալ, ՀՀ կողմից ձեռնարկվող ջանքերը տարածաշրջանում խաղաղություն հաստատելու ուղղությամբ, Ադրբեջանի շարունակական խոչընդոտները և ոչ կառուցողական դիրքորոշումը։ Այս համատեքստում ընդգծվեցին արցախահայության իրավունքների, այդ թվում՝ վերադառնալու իրավունքի ապահովման, հայ ռազմագերիների անհապաղ ազատ արձակման և հայկական մշակութային ժառանգության պաշտպանության անհրաժեշտությունը։
Դեսպան Հարությունյանն առանձնահատուկ կարևորեց միջազգային հանրության, այդ թվում՝ Կանադայի գործուն աջակցությունը Հվ. Կովկասում խաղաղության հաստատմանն ուղղված քայլերին և ՀՀ տարածքային ամբողջականությանը: Անդրադառնալով Հայաստանի՝ անմիջական հարևանների հետ հարաբերություններին և տարածաշրջանային ենթակառուցվածքների ապաշրջափակման խնդրին՝ ՀՀ դեսպանը ներկայացրեց «Խաղաղության խաչմերուկ» ծրագիրը։

Միջոցառմառմանը բացման խոսքով հանդես եկավ նաև ՀՀ-ում Կանադայի դեսպանը: Քննարկմանը մասնակցեցին նաև այլ դիվանագետներ, Կարլտոնի ու Օտտավայի համալսարանի դասախոսներ և ուսանողներ, ինչպես նաև փորձագետներ։ Առցանց հեռարձակումը թույլ տվեց բոլոր հետաքրքրվողներին մասնակից լինել քննարկմանը։

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր