Միջեկեղեցական աղոթք Օտտավայում Հայոց ցեղասպանության 110-րդ տարելիցի կապակցությամբ

17 մայիսի, 2025

Հայոց ցեղասպանության 110-րդ տարելիցի շրջանակներում մայիսի 16-ին Օտտավայի Աստվածամոր տաճարում, Կանադայում ՀՀ դեսպան Ն.Գ. Անահիտ Հարությունյանի հովանու ներքո, տեղի ունեցավ միջեկեղեցական (էկումենիկ) աղոթք:
Կանադայի հայոց թեմի առաջնորդ Գերաշնորհ Տ. Աբգար եպիսկոպոս Հովակիմյանի օրհնությամբ և կաթոլիկ եկեղեցու Օտտավա-Քորնուոլի թեմի առաջնորդ Գերաշնորհ Տ. Մարսել արքեպիսկոպոս Դամփհուսի ներկայությամբ կատարվեց բարեխոսական կարգ՝ նվիրված 1915-1923թթ. Հայոց ցեղասպանության սուրբ նահատակների հիշատակին։

ՀՀ դեսպանն իր ելույթում ընդգծեց, որ տվյալ հիշատակի արարողությունը ոչ միայն հանդիսանում է հարգանքի տուրք՝ ուղղված մեկ ժողովրդի վշտին, այլև խստիվ հիշեցնում է լռության, ժխտման և ատելության ծանր հետևանքների վերաբերյալ։ Այդ համատեքստում կարևորվեց Հռոմի պապ Ֆրանցիսկոսի դերակատարությունը Հայոց ցեղասպանության ճանաչման գործում՝ որպես բարոյական մտքի պատասխանատվության վառ օրինակներից մեկը։
Շնորհակալություն հայտնելով հյուրերին՝ Ա․ Հարությունյանը շեշտեց, որ բոլորի ներկայությունը պատվից առավել է․ դա հույսի խորհրդանիշ է, որ միասնության, հիշատակի և բարոյական խիզախության շնորհիվ հնարավոր կլինի կերտել աշխարհ, որտեղ մարդկային կյանքը և պատասխանատվությունն արժեք ունեն։

Ելույթ ունեցան նաև միջոցառման մյուս պատվավոր մասնակիցները։

Արարողությանը ներկա գտնվեց շուրջ 200 հյուր՝ Կանադայում հավատարմագրված ավելի քան 30 երկրի դեսպան, դիվանագիտական կորպուսի այլ ներկայացուցիչներ, Քվեբեկում ՀՀ պատվո հյուպատոս Լևոն Աֆեյանը, կաթոլիկ, եթովպական ուղղափառ, ղպտի ուղղափառ, ասորական կաթոլիկ, ռումինական ուղղափառ և հնդկական ուղղափառ եկեղեցիների ներկայացուցիչներ, հայկական եկեղեցու հոգևոր հայրեր, ինչպես նաև բազմաթիվ հավատավորներ:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր