Կանադա-Հայաստան խորհրդարանական բարեկամության խմբի հերթական նիստը

17 ապրիլի, 2013

Ապրիլի 17-ին տեղի ունեցավ Կանադա-Հայաստան խորհրդարանական բարեկամության խմբի հերթական նիստը, որին մասնակցեց Կանադայում ՀՀ դեսպան Արմեն Եգանյանը: Նիստը բացեց բարեկամության խմբի նախագահ Հարոլդ Ալբրեխտը, ով, ողջունելով ներկաներին, քննարկեց օրակարգը և խոսքը փոխանցեց դեսպան Եգանյանին:

Արմեն Եգանյանն իր խոսքում անդրադարձավ Ղարաբաղյան շարժման 25-ամյա հոբելյանին` նշելով, որ այդ ուրախալի հոբելյանը, ցավոք, համընկնում է Սումգայիթյան ողբերգական ջարդերի 25-ամյա տարելիցի հետ: Դեսպանը մանրամասն տեղեկատվություն ներկայացրեց Սումգայիթյան ջարդերի վերաբերյալ` շեշտադրելով ողբերգության դերը Ադրբեջանում հայատյացության մթնոլորտի ուժգնացման և հետագա ջարդերի վրա:

Դեսպան Եգանյանը մեծապես կարևորեց ՀՀ նախագահի երդմնակալության արարողությանը կանադական բարձրաստիճան պատվիրակության ներկայությունը և շեշտեց, որ խորհրդարանական քարտուղար Դիպակ Օբրայի ղեկավարությամբ պատվիրակության այցը մեծ խթան կհանդիսանա երկկողմ հարաբերությունների զարգացման համար: Դեսպանի ելույթից հետո խոսք վերցրեց ներգաղթի, քաղաքացիության և բազմամշակութայնության հարցերով խորհրդարանական քարտուղար, Հայաստան այցելած պատվիրակության անդամ Չունգսենգ Լեունգը, ով շնորհակալություն հայտնեց ՀՀ նախագահի երդման արարողությանը մասնակցելու հրավերի համար և իր հերթին կարևորեց այցի նշանակությունը երկկողմ հարաբերությունների զարգացման տեսանկյունից:

Նիստի շրջանակներում քննարկվեց նաև սիրիահայ փախստականների կարգավիճակի հարցը, որոշվեց Կանադայի խորհրդարանում պատգամավորների մասնակցությամբ իրականացնել միջոցառում` նվիրված Հայոց ցեղասպանության 98-րդ տարելիցին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր