Նախարար Քեննիի այցը Հայաստանի Հանրապետություն

01 օգոստոսի, 2014

Հուլիսի 28-ից օգոստոսի 1-ը տեղի ունեցավ Կանադայի աշխատանքի և սոցիալական զարգացման նախարար, բազմամշակութայնության հարցերով նախարար Ջեյսոն Քեննիի գլխավորած պատվիրակության աշխատանքային այցը Հայաստանի Հանրապետություն:

Այցելության ընթացքում նախարար Քեննիին ընդունեցին ՀՀ նախագահը, ԱԺ նախագահը, վարչապետը, արտաքին գործերի և սփյուռքի նախարարները:

Հանդիպումների ընթացքում բարձր է գնահատվել երկկողմ հարաբերությունների ներկայիս մակարդակը և շեշտվել է դրա զարգացման ու խորացման կարևորությունը: Նշվել է քրիստոնեական արժեհամակարգի ու Կանադայի ակտիվ հայ համայնքի դերը` որպես երկու երկրներին միավորող կարևոր տարրեր:

Մեծապես կարևորվել է Ջեյսոն Քեննիի անձնական դերը Կանադայի կողմից Հայոց ցեղասպանության ճանաչման հարցում: Հայկական կողմը նաև շնորհակալություն է հայտնել նախարարին Ֆրանկոֆոնիայի միջազգային կազմակերպությանը ՀՀ անդամակցությանը Կանադայի կողմից ցուցաբերված լիակատար աջակցության համար:

ՀՀ-ում գտնվելու ընթացքում նախարարը հանդիպումներ է ունեցել Հայաստանում գործող կանադացի գործարարների հետ, այցելել բարձր տեխնոլոգիաների ոլորտում հայ-կանադական համագործակցության առաջատար «Մակադամիան» ընկերությանը:

Այցի շրջանակներում Քեննին եղավ Ծիծեռնակաբերդի հուշահամալիրում, ծաղկեպսակ տեղադրեց Հայոց ցեղասպանության զոհերի հիշատակը հավերժացնող անմար կրակին, մասնակցեց Սբ. Պատարագի Մայր Աթոռ Սբ. Էջմիածնում, ինչպես նաև հանդիպումներ ունեցավ կանադահայ համայնքի ներկայացուցիչների հետ:

Նախարար Քեննիի այցը կարևոր իրադարձություն է հայ-կանադական հարաբերություններում, գալիս է լրացնելու 2013թ. կայացած կանադացի խորհրդարանական քարտուղարներ Դիփակ Օբրայի և Չանգսեն Լեանգի պատվիրակության այցի ընթացքում ձեռք բերված արդյունքներին, նշանավորում է երկկողմ հարաբերությունների բարձր մակարդակը և հանդիսանում դրանց զարգացման հեռանկարների առհավատչյան:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր