Դեսպան Եգանյանը ելույթ ունեցավ Կանադա-Հայաստան խորհրդարանական բարեկամության խմբի տարեկան նիստին

11 ապրիլի, 2016

Ապրիլի 11-ին Կանադայի խորհրդարանում տեղի ունեցավ Կանադա-Հայաստան խորհրդարանական բարեկամության խմբի տարեկան նիստը, որին մասնակցում էր նաև ՀՀ դեսպան Արմեն Եգանյանը:

Նիստի ընթացքում ընտրվեց բարեկամության խմբի նոր կազմ: Բարեկամության խմբի նոր նախագահ ընտրվեց իշխող Ազատական կուսակցության ներկայացուցիչ Առնոլդ Չանը: Բարեկամության խմբի փոխնախագահներ ընտրվեցին Պահպանողական կուսակցության ներկայացուցիչ Հարոլդ Ալբրեխտը, Ազատական կուսակցությունից Լինդա Լափոյնթը, ինչպես նաև Նոր ժողովրդավարական կուսակցության ներկայացուցիչ Ալեքսանդր Բուլրիսը:

Այնուհետև ելույթ ունեցավ ՀՀ դեսպանը: Նա շնորհակալություն հայտնեց բարեկամության խմբի նախորդ կազմին` տարիներ ի վեր հայ-կանադական հարաբերությունների զարգացման ուղղությամբ իրականացրած մեծածավալ աշխատանքի համար: Արմեն Եգանյանը հատուկ ընդգծեց Հարոլդ Ալբրեխտի ներդրումը, որն 8 տարի ղեկավարեց բարեկամության խումբը: Դեսպանը միաժամանակ ողջունեց բարեկամության նոր խմբի անդամներին` վստահություն հայտնելով, որ վերջիններս նմանապես իրենց նպաստը կբերեն երկկողմ հարաբերությունների զարգացմանը:

Դեսպանն անդրադարձավ հայ-կանադական հարաբերությունների բոլոր բնագավառներին` հանգամանորեն խոսելով ինչպես երկկողմ քաղաքական և տնտեսական կապերի, այնպես էլ մշակութային շփումների մասին: Նա նաև անդրադարձավ միջազգային հարթակներում հայ-կանադական արդյունավետ փոխգործակցությանը, մասնավորապես Ֆրանկոֆոնիայի միջազգային կազմակերպության շրջանակներում:

Իր խոսքում Արմեն Եգանյանը ներկաներին մանրամասն կերպով տեղեկացրեց Լեռնային Ղարաբաղում ծավալված վերջին իրադարձությունների մասին` խստորեն քննադատելով Ադրբեջանի կողմից իրականացված հարձակումը և կատարված վայրագությունները: ՀՀ դեսպանը հստակորեն խնդրեց կանադացի քաղաքական գործիչներին այսուհետ կատարել հասեագրված հայտարարություններ և կոչեր:

Պատասխանելով բարեկամության խմբի անդամների հարցերին` դեսպանը ներկայացրեց սիրիահայ փախստականների դրությունը և նրանց հուզող խնդիրները Կանադայում: Նշելով, որ Հայաստանն իր հերթին ընդունել է շուրջ 20000 սիրիահայերի և այլ քրիստոնյա փախստականների Սիրիայաից, Ա.Եգանյանը ներկաներին ծանոթացրեց Հայաստանում ապաստանած սիրիահայերի աջակցության համար գործադրվող ջանքերին:

ՀՀ ԱԳՆ
պաշտոնական կայք

Երկքաղաքացիություն

Էլեկտրոնային վիզա

Արտոնագրի ձևեր